KIGOGO WA CCM ADAIWA KUTAKA KUMUUA MToTo KiSA KUFICHA SIRI

Katibu wa CCM Kata ya Kitangili iliyopo Manispaa ya Shinyanga, Edson Timotheo Damian anashikiliwa na Jeshi la Polisi mkoani humo kwa tuhuma za kutaka kujaribu kumuua mtoto wake wa miezi miwili aliyezaa na mwanamke wa nje ya ndoa.

Tukio hilo limethibitishwa na Kamanda wa Polisi Mkoa wa Shinyanga, Kamishna Msaidizi wa Polisi, Simon Haule, na kusema kuwa upelelezi ukikamilika mtuhumiwa atafikishwa mahakamani kujibu shitaka linalomkabili.

Akielezea kuhusu tukio hilo, Mama wa Mtoto huyo, Maria Shija amedai kuwa tukio hilo lilitokea Machi 24, 2018 ambapo mtuhumiwa alikwenda nyumbani kwake kwa ajili ya kumuona mtoto ndipo akamnywesha sumu ya panya kwa lengo la kutaka kumuua.

Shija amedai kuwa, lengo la mtuhumiwa huyo ilikuwa ni kutaka kuficha siri ili mke wake wa ndoa asijue kama amezaa mtoto mwingine nje ya ndoa.

Amesema wakati kitendo hicho kilifanywa na mzazi mwenzake huyo aliyekuwa akimtuma maji ya kunywa mara kwa mara isivyo kawaida yake, na kwamba aliporudisha kikombe ndani ndipo akasikia harufu ya dawa ya panya na aliporudi kwa mtoto haraka akamkuta ameanza kutoa mapovu na mwanaume kukimbia na kopo la sumu ya panya.

Chanzo. Malunde Blog